مسلسل "حياة" - الحلقة 28

الحلقة الثامنة و العشرون (28) من مسلسل حياة

- اشكون ؟؟؟؟
- ايانا حميد!!! اخالتي منانة؟؟؟
- وياك لاباس اوليدي هاد المجية فهاد الليل؟؟؟
- اخالتي، راه قالك العربي، اعطيه الكارني ديالو راه خلاه فالفيسطة، راهم جاو الجدارمية للدراز، كايداديو علا شي شفارة وراهم جمعو دي ماعندمش لاكارط؟؟؟، ودبا عطيهالي نعبيهالو كما يطلقوه بلا مايعبيوه يبات فلابريگاد!!!!
- ايحا عل الجيفا لاخور!!!!! باه تعرفو منحوس!!!!، ديما عاملو فطابقو وهاد النهار نساه؟؟؟، ايوا عاين نخرجالك؟؟؟

حياة من دي احملت مراة خالا وهي كاتخمم،دبا اسانست فالمدينة، كاتقرا عل الضو والتلفزة، وكاتمشي لصحاباتا تراجع عندم، وهوما كايجيو لعندا، واش زعم يخليوها عندم تكمل قرايتا ؟؟؟ ياو يصيفطوها ترجع للبلاد،؟؟

- ماما بهبة؟؟؟، واش ماشي تخليوني هنا معكم؟؟؟ ياو نرجع للبلاد؟؟، دبا هانتين ماشي تولد انشا الله شي بنيتة يا ولييد، دي يقولك ماما، ماعندكوم ماتعملو بيا؟؟؟
- حياة!!! شكون دي قالك هاد الهضرة؟؟
- انتي راك بنتي!!!، وخا نولد راك ماشي تبقا معانا، وانتي عزيزة عليا بزاف، وخا تشوفني معصبة عليك، راه غير لوحم وصافي؟؟؟، لياه ماكتشوفشاي احبيبك من نهار احملت وهو طالعلي فجنوني؟؟؟
- لاهلا يخطيك ا ماما بهية، حتانتين راك فموطع يما

- عاود راجع كاتدق ا حميد؟؟؟ ايوا عاين !!!!
- اه،!!!! وليدي حسن!!!!!، اعالسلامة دالحبيب!!
- اشخبارك اوليدي، والله مايحسابلي ايلا حميد، داك الخطية دالعربي، جاو الجدارمية للدراز وهو نسا الكارني ديالو فالفيسطة!! وجا حميد عباهلو كما يطلقوه ، ادخل ابني بعدا!! ماتبقاشي فالباب؟؟
- ايوا اشخبارك ابني؟؟ والله ايلا توحشناك وخليت موطعك؟؟ لانتين لا ديك الجروة دي حياة!!!
- لاباس ايما الحمد لله، حتانا توحشتكم بزاف
- والله يا وليدي وماتسالني حلوف، النهار كامل وهو كاياكلني السلام، وهاد العين غير كاترجف، وكانقول علا من ماشي نسلم؟؟؟، ايوا علا سلامتك يا وليدي، ايوا اش هاد المجية؟؟ حتا لليل، والظلام وحت الراكوب والو،؟؟، وماجي مثقل، غير وجهك يابني؟؟؟
- ايما عاد كتاب، وصلنا لصفرو فالليل، وماجبرناش فاش نجيو، سخر الله كنا يانا ومصطفى وشي اربعة دالدراري حتا هوما من بن يازغة، وقبطنا طاكسي خلصنالو المجي والرجوع، قالك اشماشي نجيب من تما فهاد الليل؟؟؟ الريح!!!
- حتا مصطفى جا!!! ايوا هنيا لمحجوبة مسيكنة تفرح بوليدا

ها العربي داخل..

- اهلا الشاف حسن، اشخبارك؟؟؟، انتينا هنا والجدارمية كايتكرفصو علينا؟؟؟

ناض حسن وتسالمو..

- اهلا خاي العربي، ايوا هزز الكارني ديالك ، ومايهضروشاي معاك!!!
- سير ا العربي اعمل واحد الكاس داتاي، جيت جيت، خليني نجمع مع خاك
- ايوا يا بني، اشخبار احبيبك ومراتو واختك حياة؟
- ايما شحال هذا بيني وبينم، من دي مشينا لمراكش، ماشفتم
- ولياه ابني هاد مراكش ليهن من الرباط يا لاون؟؟؟
- ليهن من الرباط ايما، بعيد بشي 300 كيلوميط
- ثلثميا كوللا يا ابني، يانا غير من هنا للمنزل وكايطيحو ركابي
- هههه، ايما راه الحديد دبا كايقررب البعيد

يتبع...