بوعزة مشا للمقدم باه يخدملو شهادة الضعف،
- السلام عليكم، اشخبارك ا المقدم
- لاباس ابوعزة، اش هاد المجية، ؟؟؟
- لا لاباس، غير ابني بغا واحد شهادة الضعف، باه يدفعا الخيرية كما يقيدوه
- ايوا لاواه ا بوعزة، انتينا راك ماضعيفشاي، عندك الكسيبة وعندك البلاد
- ياك ا المقدم!!! حتا دوك المطاير دي حرث يومين بانولك بلاد؟؟؟
- ايوا اخدملي الورقة ياو ندخل برجلي للقايد، الولد صغير مايقدرشاي عل الطريق وماجية الشتا والبرد، اما الكبير راه اسانس بهاد الحربان دي مابغا يعفو علينا ربي منو؟؟؟
- ا ياجي يا بوعزة، لياه دغيا كاتقلق، ارا داك الكناش لاون نكتبالك وعبيها للشيخ يسنيهالك،
بوعزة ديما فالعشية كايلاقي بنتو حياة للمدرسة، خايف عليها بزاف، غير كاتشوفو كاتجي كاتهرب تعنقو وتحبلو يدو، ويعطيها الحلوة، وكاتجي فرحانة للدار.
رشيد قيدوه فالخيرية، كاياكل تما ويبات تما، حتا السبت عاد كايجي فالعشية للدار، اما حسن كل نهار عندو جبدة د الطريق صباح وعشية، وكايعبي معاه الخبز من الدار فشكارتو والزيتون او شي حاجة بقات من العشا، كايعملا وسط الخبز.
العربي هاكدا كايقييل مع الكسيبة، كايغووت بوحدو، ولكن عندو واحد الكمانجة صاوبا من البيدو دالقزدير، كايقييل جامع عليه السراح، وكاينسا الكسيبة، مرة يروحا مجموعة، مرة يتلف نعجة ياو حولي، ديما فالغوات مع ابباه بوعزة.
اما منانة هي مسكينة دي فالعذاب، من دي كايصببح الصبح وهي فالعجين والكانون والصابون حتا كاتغرب الشمس، ماعندا بنات دي يعاونوها، يدا بوحدا، البنيتة دي عندا كاتقرا وباقية صغيرة
