قصيدة الطلاق وسباب الفراق لخديجة اليازغية
في الاونة الاخيرة اصبحت بلادنا تشهد ظاهرة متفشية بكثرة حيث ملئت المحاكم بملفات وقضايا الطلاق ،وهذه الاخيرة راجعة الى قلة الوعي والادراك لمفهوم الزواج الحقيقي وما يعنيه من ترابط وتلاحم وقدسية من كلا الطرفين.
لهذا قمت بكتابة هاته الاسطر التي تعبر شيئا ما عن بعض من اسباب هذه الظاهرة، وااسف حقا لهذه الحقيقة المرة من واقعنا واطلب من الله ان يهدينا ويهدي الجميع سبل السلام. وشكرا.
يما واش هاد الزمان
يما تقاضى لامان
تقاضى الخير والحسان
حتى واحد ما بقى مزيان
كلشي ماشي بالكانة.
الزواج كمالة الدين
تستر المرا حروف الزين
الراجل يحدر العين
نفرحو بيهم كاملين
تكون حياة مزيانة.
يما هادشي ما كاين
كثرو علينا المحاين
والهم ولى هماين
ما تكملش عامين
راجل مهجج ومرا مغنانة.
خرج عليهم الاعلام
بغاو يقلدو الافلام
قتلم الهم والتخمام
ما بقاو يعرفو سلام
ما بقات فقلبم حنانة.
يتزوج الواحد ما على بالوش
بلي هاد الزواج مغشوش
وكلشي من بعد مفروش
والمنفوخ يولي منفوش
وتفركع الرمانة.
راجل باغي يتزوج
هو مازال مهجج
يتسارى برا ويغوج
فوسط دارو يتعوج
ديما حاضي المكانة.
راجل ما قاد بمصروف
راد اللومة عالظروف
كلامو يشحف الجوف
مرتو عايشة فالخوف
رحمها يا مولانا.
راجل مزوج وباقي
تابع البنات فالزناقي
ويقول سباب طلاقي
مراتو اما هو تاقي
هو دي كانلا فزمانا.
هاز التيلفون ويشاطي
ديما فالتعبئات ويراطي
ما يحط عالحروف نقاطي
يضيع الفلوس بالقباطي
وولادو قالو بانا نسانا.
ديما على برا تالف
وفمرتو ديما حالف
هضرتو بحال الجارف
معطل كيف موالف
داق القيطون فالقهوة وركانا.
حتى المرا فيها حقا
ماشي غير وطلقا
عايش معاها فالحرقا
نسات الله لي خلقا
طايرة ما تعرف رزانا.
مخشية فالكوزينة
ما تسمعلو كلمة حنينة
خدامة كيف الماكينة
تلاقيه فيدها العجينة
وتقول المصروف ما كفانا.
تقولو حبيبي ما حلاك
قلبي راه بغاك
نعيشوا غير انا وياك
ما تكون ختك ولا يماك
نفرحو ونعيشو هوانا.
داتلو عقلو مسكين
من بعد ما كان رزين
ديما راد دموع العين
ديما يتمتم وينين
ربي هاكدا بغانا.
ديما خارجة من الدار
تعرف الغريب والجار
هو ما جايب خبار
ديما مبخرا لو بالعرعار
هاد الهم منين جانا.
بلا سحور وشعواذا
الراجل منها يتاذى
هادشي دابا يتقاضى
هزي التسبيح والسجادة
تعيشي معاه سلطانة.
الفايسبوك والواتساب
دمرو عقلها يالحباب
ما بقات تعرف صواب
ديما سادا داك الباب
كتزنزن كيف الذبانة.
حوتة تخنز الشواري
ضاعو بنات ودراري
لي مضيع حياتو فالصحاري
ولي داير ومساري
هاد المصير راه عيانا.
المحكمة بالدعاوي عمرات
بين زوج صعابت الحياة
بينهم ضاعو الوليدات
يميزو ويخسرو فليسات
والدولة يحسن عوانا.
نجي نعاود كاين بزاف
كل واحد من الزواج يخاف
كاين الناس وكاين الجياف
كاين الغيس وكاين النشاف
ماكاين لي يعطيك الاعانة.
الراجل خاص يكون راجل
ما يكون على مرتو غافل
يحضي ولادو ويقابل
ويكون فحياتو عادل
ما يقولشي غير انا.
المرا خاص تكون مرا
تكون عفيفة نقية حرة
تضوي دارها كيف الكمرة
ما تعيشي فالقهرة
تكون قارية فنانة.
التيقة تكون بيناتم
يفكرو فمصير ولادم
ينساو هضرة بنادم
يسايسو ويديرو اللازم
وربي يكون معانا.
