السلام عليكم ورحمة الله تعالى وبركاته.
اخواني اخواتي الكرام والكريمات، المهتمين والمتتبعين للقصائد الشعرية والزجلية والسرابات للتراث المحلي، أقدم لكم هاته القصيدة، على طريقة الصينية والكيسان، أتمنى أن تروق إعجابكم، تحت عنوان: النحلة
وايا النحلة ترعى الورد والنوار
وايا النحلة ترعى العشوب والازهار
وكاتلقح بين الثممار والذككار
علمك معروف مايحتاج تطوير
ويا النحلة عسلك باين معروف
وراه باللون والمذاق موصوف
وكاتجبرو فالمتاجر فجميع لرفوف
والثمن باين ما يحتاج تسعير
ويا النحلة مذكورة فالسنة والكتاب
وراه عسلك مكون من جميع الاعشاب
وكايداوي شللا د الامراض والاعطاب
عسلك صافي مايحتاج تكرير
ويا النحلة راهم عرفو قيمة دواك
ويا النحلة راهم عرفو قيمة الاشواك
وراك داويت شحال من مرض فتاك
حار فيه الطبيب والخبير
ويا النحلة ساكنة فالغابة والجبال
وا مايوصلك غير الشديد فالرجال
ا ما يسلم من قريصك فجميع الاحوال
يرجع حنكو بحال ايلا منفوخ بالكير
ويا النحلة راهم كثرو شحال دالفروع
أ كايبيعو جبحك من الشمع مطبوع
أ كايبيعو العسل مغشوش غيرمصنوع
ماتفرق بينو وبين الكونفيتير
ويا النحلة حبسوك فداك الصندوق
وراهم بعدوك عل الليمون والبرقوق
وكايعلفوك السكر مسوس فالذوق
ويقولو عسل حر ما فيه تزوير
ويا النحلة معروفة بالصدق والامان
وكاتدافع عل الجبح وتحمي المكان
وما تخليش الضرر يوصل كيف ماكان
تضحي بحياتك ويعيش السلطان الكبير
