السلام عليكم ورحمة الله تعالى وبركاته
اخواني اخواتي الكرام والكريمات، المتتبعين والمهتمين بالقصائد الزجلية والسرابات من التراث المحلي، اقدم لكم هذه القصيدة لها لون غنائي جميل، من الحان الشيوخ القدامى رحمة الله عليهم جميعا، تحت عنوان: بلادي
بلادي
اهآ طالبين من الرب الاعلى
يشوف من البلاد وحالا
كولشي راه فالوحلة
دي صحيح ودي ضرير آي
اهآ شايفين الدنيا خضرا
منورة لوطا والحجرة
وطالبين مول القدرة
ينعم علينا بالقطرة
ويفرح الفلاح كبير وصغير، آي
اهآ بلادكوم يا شباب الغد
كاتعاني فالشتا والبرد
وتقاسي ربيع وصهد
وانتم باغيين الواجد
بلا محنة بلا سهير، آي
اهآ بلادكوم ا هايا البنات
بغاتكوم نسوان حررات
واقفات عل الصح والتبات
ماتهمكوم لا اشهارات
ولا موضة فالطويل والقصير، آي
اهآ بلادكوم السادة الرواس
كولكوم تاج فوق الراس
بغاتكوم تكونو حراس
وتخدمو مصالح الناس
وحنايا الحجرة دالساس
ونطلبو من الله التيسير، آي
اهآ بلادكوم السادة الجنود
رمز القوة والصمود
بغاتكوم تحميو الحدود
العدو دايما موجود
قلبو محساد وشرير، آي
اهآ بلادكوم السادة الكبار
رمز المسؤولية والقرار
بغاتكوم الخدمة والزيار
كيف المدينة والدوار
وتزيان الحالة مايبقاشي فقير، آي
اهآ بلادكوم السادة فالمهجر
قاطعين الرمال والبحر
دي بغاها تزيان وتكبر
بالمال فيها يستثمر
مايخسروش فبلاد الغير، آي
اهآ بلادنا بلا مصنع ولا معمل
شوف الفلاح والعاطل
كايدور العام كامل
شي يعاين يوجدلو العجل
شي يعاين يكبرلو الفحل
شي ازرع اللفت والفجل
شي قبط الحرير كايغزل
والموظف ماكفاه الصالير، آي
اهآ بلادكوم السيدات والسادة
كلنا جماعات وفرادا
نخدمو بالصفا فوق العادة
قدام الجيران ولعدا
ويتهز العلام فوق جناح الطير، آي
