قصيدة النوارة إهداء لكل النساء اليازغيات بمناسبة اليوم العالمي للمرأة
النّوارة
آه يا اليازغية ويا النوّارة د البنات،
يا الكاملة بالصورة والذات،
وتقول الى نقشك شي نحّات،
يا جامعَة الشمل والشتات،
دي ماعبّاك شحال هادي مات،
وتعزّى فموتو يا عود الكافور.
آه يا اليازغية ويا سلطان الزين،
يا كحلت الحاجب والعين،
شنداك الزين متين،
يا حلاوة الهندية والتين،
كتصبر مدة وسنين
كيف العسل الحور.
آه يا النوّارة اليازغية،
كويت قلبي ميات كية،
زينك قرطاس ساط فيا،
نرجى ربّي يحن شوية،
ويحكم حكامو عليا
مانبقاشي معذور.
آه يا اليازغية ويا النوّارة دازويول،
نرتى عليك ونحاول،
ما تغزل ما تنشج فمناول،
غير گابليني وطلقي الشعور.
آه يا اليازغية ويا النوّارة د الگندول،
ريحتك كاتلف العقول،
مربية من صغرا أصول،
باباها و عليها مسؤول،
زينها مامنوش مثول،
ومبرود كيف المنجور.
آه يا اليازغية ويا النوّارة د النّعمان،
يا المسرارة بالالوان،
دي عبّاك عليه الامان،
مايغطب ما يشوف حزان،
والخاطر ديما مبشور.
آه يا اليازغية يالنوّارة الثخثوخة،
حيّرت كذا من مخوخا،
بديك الحروف كتجيب الدّوخة،
وشي خدود عندا كيف الخوخة،
كايحليو الفا من الحرور.
آه يا اليازغية ويا النوّارة د التّفاح،
دي نشوفك انا نرتاح،
كانفشل ونرمي السلاح،
ونسى الهموم والجراح،
وما نشد بزمام الامور.
آه يا اليازغية ويا النوّارة د البرقوق،
كاتعلّي فالعرش الفوق،
وتخليني فحرّ الشوق،
فاي يجري بالما مهروق،
وحلوة عسل من التمور.
آه يا اليازغية ويا النوّارة د الزيتون،
كيف زينك محال يكون،
والقبيلة تحسن العون،
كل مرة شكلك فلون،
سبحانو في خلقو شؤون
هداك الله الغفور.
آه يا اليازغية ويا النوّارة د الرّمان،
يا الحمرا فالخدّان،
يا الدّوا د العيّان،
يا المحروسة بالبيان،
نخاف عليك من داك الغندور.
آه يا اليازغية ويا عرش اللّوزة،
يا صبيحة المشية والگوزة،
دي كسبا تنوضلو قرقوزا،
هازّا راسا ومعزوزة،
وفشغلا ديما مكروزة،
نعنقا يانا ونحوزا
فالخدود والصدور.
