تحية لكم وتبقى بنيازغة صامدة وخالدة.
هذه القصيدة مهداة لكل يازغي فخور بيازغيته.
كما أني أشكر كل من صفحة بنيازغة، خالد ومحمد السحيمي، محمد الرطيلي، محمد الحروف، محمد أمين قويسم، محمد السليلة، أحمد تواغد وكل من ساهم في إطراء المشهد والتراث الثقافي لبلدتنا الغالية من قريب أو بعيد وشكرا.
ايا بنيازغة لعزيزة عليا ايا غزالت لطهور وسبو الغالي
وكانمشي للقصبة نفوج بالي
وليك الحبيبة نشكيلك حالي
وكانرتاح مع عمومي وخوالي
هزو يداكم بجوج ودعيو معايا
ايا بنيازغة لعزيزة عليا ايا غزالت لطهور وسبو الغالي
وكانبردع بغلي ونمشي تالتغيت
تما برجال العز راني تلاقيت
عرطو عليا لكرام معاهم لاغيت
وحلات الجلسة بالطحك والمايا
ايا بنيازغة لعزيزة عليا ايا غزالت لطهور وسبو الغالي
وشحال غزلان الناس دي مطرناغة
السلهام لبيط والرزز والبلغة
وكلامم صبيح سمع واسلغا
ويغامرو معاك حتى لطرفايا
ايا بن يازغة لعزيزة عليا ايا غزالت لطهور وسبو الغالي
مشيت نقطع الواد نشوف ملاحة
تما فاين راك تشبع غير راحة
وقطاعت فبورجيلة وهاز دلاحة
وطاحتلي فسبو وطحكو عليا
ايا بنيازغة لعزيزة عليا ايا غزالت لطهور وسبو الغالي
مشيت معروط عند با التغروتي
ولقيت فيه الخير كتر من خوتي
لعبنا يانا وياه طرح دالتوتي
غلبني ولد النيفر مخلاهاش فيا
ايا بنيازغة لعزيزة عليا ايا غزالت لطهور وسبو الغالي
كلنا الرمان ودودو من عودو
تما فديك لرط دي ولاد مكودو
بنادم فيها حمرين خدودو
معروفين بالخير والجود والنية
ايا بنيازغة لعزيزة عليا ايا غزالت لطهور وسبو الغالي
ويلى بغيت المركوب خصك درهم
حتى لديك لبلاد دي بودرهم
فيها الارض وطا عامرة فوارم
نسلم عل السطيلي ولد المغيلية
ايا بنيازغة لعزيزة عليا ايا غزالت لطهور وسبو الغالي
وهبطت تا هبطت ومشيت لقراطش
تما موجود الخير وبنادم عايش
هناك البراني يحصل مايغادرش
الى قبطت عليه شي قرطاشيا
ايا بنيازغة لعزيزة عليا ايا غزالت لطهور وسبو الغالي
مشيت ساريت ملقلعة لدار حقون
وفيهم بزاف دالسواقي ولعيون
ولقيت الزين تما كامل متقون
بين عين كبير والمروج كاينة الكدية
ايا بنيازغة لعزيزة عليا ايا غزالت لطهور وسبو الغالي
طلاعت فالعقبة دي ولاد مريان
ويا خوتي راهم ناس دالاحسان
ومافيهمشي بنادم دي عيان
ويا بلقاضي يا زين السميا
ايا بنيازغة لعزيزة عليا ايا غزالت لطهور وسبو الغالي
كنا نگوزو من داك واد العطار
ايا خوتي وكنا مازال صغار
فالشتا كاترجع طريقو خطر
ايوا باش نقراو فالاعداديا
ايا بنيازغة لعزيزة عليا ايا غزالت لطهور وسبو الغالي
كنا نمشيو للمنزل عند برزاز
معامرين جيابنا بالخبز والتغزاز
كان خدام معاه واحد لقزاز
طبسيل دالبيصارة كيحسبو بميا
ايا بنيازغة لعزيزة عليا ايا غزالت لطهور وسبو الغالي
اكانشكي وراني فالغربة مقهور
اماتخلينيشي بين الحيوط محصور
وشوق البلاد راه في قلبي محفور
وهنا يالحباب كملات الرواية
تعليقات
إرسال تعليق