قصيدة "مامدينية ما عروبية انا اليازغية" - عادل اليازغي

في إطار سلسلة قصائد التناعير بين شيوخ بني يازغة الشباب، نقدم لكم رد عادل اليازغي على عمر الكرمي و محمد ارطيلي بقصيدة "مامدينية ما عروبية انا اليازغية":

مامدينية ما عروبية انا اليازغية
الزين تفرق وانا ديت منو لقياس
لافالعقل لافالفعال او حتى فاللباس
وديما منورة فعيون كل الناس
الما دالعيون والبيار ماخلا حد مضيوم
***
ما مدينية ما عروبية انا اليازغية
ديت حقي فالدنيا ماخصني والو
قانعة بالخير والزمان وحوالو
ولي تعاند معاي غايضرو بالو
مانشكي من الحال ومهنية مالهموم
***
ما مدينية ماعروبية انا اليازغية
قلبي على داري وكتافي حر من الجمر
نوض فالصباح بقوة تهرس الحجر
راه حد ما فايت حد غير بالصبر
زيدا فراسك هادي أقبيح السلگوم
***
ما مدينية ما عروبية انا اليازغية
نطلع فالعقابي ومانقولش آح
نقرا ونخدم الشغال مدي كايصبح الصباح
نسيق ونعجن ونطيب الخبز فالفرَّاح
ودي قال هادشي ماكاينش ماهو غيمسموم
***
مامدينية ما عروبية انا اليازغية
بنت البنوت ودي مكايعرفنيش يسال
نقي الشعير والقمح ونصفيهم بالغربال
وخدمتي خفيفة ورزينة ونطير بحال البرطال
ونعرف نطيب ابلبول حسن من خالتك حدهوم
***
ما مدينية ماعروبية انا اليازغية
الشعر مسبسب والعيون الحورش
ديشافني فالصهد كايبرد ويتبورش
وكلامي يلا هضرت كايسمعوه الطورش
وبنادم من شوفتي كايصبح مغروم

1. قصيدة "انا راني ولد الفقير" - عمر الكرمي
2. قصيدة " وياك انا العروبية " - عمر الكرمي
3. قصيدة ” وياك انا المدينية “ - محمد ارطيلي 
4. قصيدة "يا المدينية يا خيتي" - عمر الكرمي