يا الخوت فيدوني - لمصطفى مرغيش

المصطفى مرغيش. 

يا الخوت فيدوني مايكون عندكم باس
بغيت نتوب و ندير عقلي بحال الناس
كولشي تنهى وأنا كان مديني نعاس 
كان عقلي طايش جات طربة ف راس
و بابا وصاني قالي المجتمع ما كيرحم

وليني نشكر و نحمد ربي العالي
دعيت لو و هزيت يدي لعندو و هداني
فضله عليا كثير ما لو كان راني مزال كنعاني
ربي فرج عليا و خرجني من الغم

شحال من ناس ظلمت نطلب يسمحولي
كان غارني شيطان و عاجبني طولي
على دوك الفعايل نستاهل دبيحا بحال الحولي
نتوما مالين الخير نساو هاد الهم

كنت كنجري غير فالحاجة القبيحة
و مبلي بالكارو و التنفيحة
وليني الله نجاني من هاد الفضيحة
رجعت كنمشي فكل خطوة تسبيحة
ومن هنا القدام مزال الخير تم

نوصيكم يا العباد عنداكم البلية
طيعوا الله والرسول وديروا النية 
عملوا الخير فالفقير و شويش د الإنسانية
و الشر عمرو ما كايبدل لون دم

ها وذني من العمايل و الأخلاق العيانة
فتش و قلب على شي خصايل مزيانة
نور عقلك بالعلم و عاود القلبك صيانة
وقول كلام زين و لا شد داك الفم