قصيدة بعنوان اللهم لك الحمد لشيخ السي محمد العوين رحمه الله يرثي فيها طفله

 يوسف دو 14 سنة الدي توفي غريقا في واد سبو مدينة القنيطرة رحمهم الله القصيدة مادات من طرف السي محمد لعوين رفقت اخيه و اصدقائه ابناء البلاد في مدينة القنطرة سنة 1989

اليكم كلمات القصيدة فانتظار رايكم بعد الترحم عليهم :

اللهم لك الحمد ر بي فالسما والارض والموت الا جات لعبد ماتخير ما كتختار
==================================
اللهم لك الحمد دارلي واد سبو فرسة لي عمرها ماتنسى جر ولدي لتحت لمرصة جيفوا و حنيا فالدار
=============================
اللهم لك الحمد موت فرض مشي شمت جاتنا غير على بغتَ غير دخلوا ديك لڭلتَ غرق هو رجعوا ستَ خبعو لباس والخبار
==============================
اللهم لك الحمد هاد دري وافي عمرو راه لازم ادخل قبروا يا ولادي لاش نكفروا رجعوا لله وصبروا لا تلموشي دي حضروا كنلوم حببابم لكبار
===============================
اللهم لك الحمد صبنا الرجال وعيلات كلم خرجوا بالربات وسفين حدا المحلات كيقولا راه يوسف مات حتى شي وحدة ما جات دي تغير داك المنكار
===================================
اللهم لك الحمد چالس فداري كنرجى خرج ولدي ديك الخرجة وغيبوا من تمَ ما جا جيفتوا دي الموجة الصندلة والقميجة خبعوها قلوب الكفار
=================================
اللهم لك الحمد جولوا ستَ من لصحاب كلهم دراري شباب كيدقوا تمَ ف الباب قال هدوا هما الحباب غي غرق هربوا الدياب دي وصل لمو سد لباب ما نفع صاحب ولا جار
================================
اللهم لك الحمد ف التلاتة غير تغدا و العمر مسكين تفضى مشى من تمَ جرية وحدة قصير لعمر ما يتحضى طويل لعمر ما يتأدى جاب سيدي ربي لقضى تحزموا علمونا بعدا مع الربعة باقي النهار
=================================
اللهم لك الحمد ولدنا مشي ضحية الموت راه فرض عليا داهلي دي خلقوا ليا وخترلوا ربي سمية راه تركة مرضية باش غدا يشفع فيا ويرغب لكريم عليا ما يولجنشي لنار
===========================
اللهم لك الحمد حرزتك اولددي السلامة راك ماخليت يتامة وما هرت مع نمامة ما درتي محرمة خرجت الدنيا مظلامة حتى حنا ماجين لتمَ شوفنا يوم لقيامة جيب لنا شربة د الما غالية من واد الكوثر
==============================
اللهم لك الحمد لا لويدان ولا البحر حد ما يحكم عل العمر من السما كاينزل الامر عند مول الشمس الڭمر مشي يا ولدي من الصغر الله فرض عليا الصبرحوطناك ليوم المحشر تم كيربح دي صبار
================================
اللهم لك الحمد سير يا ولدي ودعناك سير يا ولدي صدقناك الله الكاريم بغاك الوقت لعشنا موراك الرضى عمروما يخطاك قد ما ضوات القمار
==========================
اللهم لك الحمد الموت ياولدي مفروضة يامنا كلها معدودة كلشي يمش لروضة وسير حتى نوصل غدا دي يموت صغيور بعدا ورقتوا كتمسي بيضة معاه لجنّة كيحشّار
=======================
اللهم لك الحمد الموت دي كتخلي لخيام غير كتقضى ليام فينهوا سيدنا ادام و النبي عليهم السلام خلقت اولدي ف الاسلام وبقيت 14 لعام ومستي تحي لعظام روحت لعزيز لجبار
=========================
اللهم لك الحمد الله يهنيك ايا ولدي الموت ما عندي ما نقضي نقدم الصبر هادا جهدي راك طير الجنّة مرضي خير من دي تبقى عندي تجرك الدنيا لخطار
========================
اللهم لك الحمد ونختم ب استغفر الله ونقول الحمد لله ونقولوا سبحان الله دي عطنى هاد آلاقدار
======================
اللهم لك الحمد ونختم ب استغفر الله ونقول الحمد لله بوحدوا لا شريك له ونقولوا سبحان الله ونقول الله اكبر ؛؛؛؛؛