بمناسبة أعياد الرجل الثلاث مائة وأربعة وستين، أتوجه بهذه الأبيات المتواضعة للرجل اليازغي لتهنئته بذلك تقديرا و احتراما له.
السلام عليكم يا اخوان
سمعو لكلامي وسمعوه مزيان
ماهو تخربيق ولا كلام عيان
كلام صحيح ومعقول.
المرا خاصا احتفال
والراجل مسكين ذبال
خاص نردوليه البال
ما كبر فينا ذهب ولا مال
يناهب علينا من الذيب والغول.
يازغي حر واصلو معروف
ما يعرف خوف قاد بالمصروف
يكسيك فالعيد ويشرليك الخروف
حاض طرافو وقاري الحروف
ما تغلطيش وتقولي مهبول .
التاغروتي راجل يازغي رزين
يدخلك الدار يوريك بيت الخزين
يوطفلك القفة ويصيفطك للعين
تهلاي فيه ووجديليه الطاجين
كاس اتاي وكسكاس دالبقول.
الحقوني راجل يازغي عاقل
يحمرليك الجلال ويلبسك الخلاخل
يوجدلك المنسج والمناول
متواضع وكلامو كييف عامل
انسان معروف ماشي مجهول.
المكودي راجل يازغي فياش
واخا هاكداك ضريف ما عرفت علاش
طبعو سخي ماشي قمشاش
يلا بغاك يشويليك الكباش
حنين وكلامو معسول.
المنزلي راجل يازغي قاري وفاهم
فالتاربخ والحضارة بتقافتو ساهم
الحزن والهم ملي تكوني معاه نساهم
واخا كيطيحو عليه شي ملاهم
عزيز عليه يكتاشف يسافر ويجول.
القرطاشي راجل يازغي تاقي
عندو حضور وتعامل راقي
كيف كان زمان راه باقي
غير عاشريه شوفي كيف لاقي
توكلي عالله وسير للعدول.
المطرناغي راجل يازغي معقل
ولد الناس والاصل والمفصل
ما يهزو ريح كيف الجبل
غير كوني ساروت راه هو قفل
حافظي عليه من القثل والقول.
القصوابي راجل يازغي مغوار
عارف بحق العائلة والجار
يحترم ناس كبار وصغار
يرحب بيك ويدخلك الدار
يلبسك تكشيطة ويحزمك بالمجدول.
السرغيني راجل يازغي مليح
كيف الزبدة ردي ليه البال ليسيح
ما عندو مع زهو ولا شطيح
يدخلك من الشتا والريح
غير ديه راه انسان مسؤول.
الملاحي راجل يازغي عادل
يضويلك الطريق بالشمع والقنادل
فالتعامل والمحنة ماشي ساهل
يبغيك وعلى لي يرضيك ما هو غافل
منور وعاطيه الله القبول.
الدمراني راجل يازغي مقاد
يحطب ويجيبليك العواد
يساريك الجبال الغابة والواد
ما عندو مع قباحة ولا عناد
على ودك يبيع البقر والعجول.
المغيلي راجل يازغي مغنان
فتعاملو مع المرا فنان
زين العقل وعندو البلان
غير ديه الالا راه انسان مزيان
محبتو دايمة ما تزول.
التاغتي راجل يازغي زاهي
غير فتعاملو تبقى فاهي
ما عندوش مع اللعب والملاهي
يفكر فيك وديما ساهي
عقلو رزين وقلبو مغسول.
المباركي راجل يازغي متقون
يساريك الدواور والمدون
ويجيب عليك الكلام الموزون
يبغيلك الخير وسرك عندو مدفون
يهديلك ازويول ونوارة الgندول.
العنبيطي راجل يازغي زهواني
غير ديه كلامو سطاني
يقول الكلام ويضرب المعاني
يشكل بالطين الكصوع واللواني
راجل بكلمتو ماشي مدلول.
الزاوي راجل يازغي هواوي
باغي الخير وعالمعقول ناوي
يتصرف بالفعال ماشي غير داوي
يبخرليك بالعرعار والجاوي
ما فيه بسالة ولا فضول.
الڭعداوي راجل يازغي مسرار
انسان مول العقل وصبار
يبغيك بالصفى لكن مغيار
يجيبلك الورد كل نهار
ما عندوش مع الخروج والدخول.
الراجل اليازغي راجل ونص
يلا عاشرتيه عمرك ما تخص
محبتو ليك محال تنقص
غير عيشي حياتك و رقص
