يازغيات - رجع الربيع
لالا يا مولات اسبنيية
لالا جيبنا الحصير
وفرشو على جنب البير
وبطر بالكيسان والصينية
طل النوار على باب الدار
و بالنعمان سرح فالدوار
طالق ريحتو ليل ونهار
زيان الوقت والنزاهة حلات كل عشيية
الجو صفا وقلال التخمام
والسما ارتاحت من الغيام
حمدنا الكريم العلام
عاد بدات تطحكنا الايام وزادنا ربي الهدية
الكمرة فالسما ضوات
خرجو لولاد والبنات
والناس بالعشق غنات
والصلاة والسلام على سيدنا محمد صبيح السمية
الشمس طالعا فرحانا
والسما تسبح لمولانا
والارض زيانت لوانا
وفالخربة دي هنية راها نورت الهندية
العيون والسواقي رجعت
وحميطة فأكدميون طفحت
هاد العام الصبا نجحت
ها مارس عل البواب قريب نكردوا الجلبان
ونحفروا على البطاطا القصبية
الربيع على كل الاشكال
طلقوا للبقر والبغال
يرعاوا كيف ما حبوا ورضاوا
وحتشوا تيجامل وتيمرصاط حتى هي
باش نعطيوها للقنية
لا لا يا مولات الخال
جري راه زيان الحال
والعزري علينا عوال
نمشيوا نخطبولو هاديك دي عندو فالبال
من مطرناغة السفلية
